Saturday, October 09, 2010
കോട്ടയം: പരുമലയില്‍ യാക്കോബായ സഭ പള്ളിനിര്‍മ്മിക്കുന്നത് സംബന്ധിച്ച് ഓര്‍ത്തഡോക്‌സ് സഭ ഉന്നയിക്കുന്ന ആരോപണങ്ങള്‍ അടിസ്ഥാന രഹിതമാണെന്ന് യാക്കോബായസഭ നിരണം ഭദ്രാസനാധിപന്‍ ഡോ. ഗീവര്‍ഗീസ് മാര്‍ കൂറിലോസ് മെത്രാപ്പോലീത്ത പറഞ്ഞു. നിലവിലുള്ള പള്ളിയുമായി ബന്ധപ്പെട്ട് ഒരു പ്രശ്‌നത്തിനും സഭ ആഗ്രഹിക്കുന്നില്ല. വസ്തുതകള്‍ തമസ്‌കരിക്കുന്നത് ശരിയല്ല.
ഓര്‍ത്തഡോക്‌സ് സഭയുടെ കൈവശമുള്ള പരുമല പള്ളിയുടെ ആധാരം അന്ത്യോഖ്യാപാത്രിയര്‍ക്കീസ് വാഴിച്ച മലങ്കര മെത്രാപ്പോലീത്തയുടെ പേരിലാണ്.
അന്ത്യോഖ്യാ പാത്രിയര്‍ക്കീസിന് കീഴ്‌നടപ്പിലുള്ളവര്‍ക്കുവേണ്ടിയാണ് സ്ഥലം നല്‍കിയതും സെമിനാരി സ്ഥാപിച്ചതുമെന്ന് ഇതില്‍ വ്യക്തമാക്കുന്നുണ്ട്.
പരുമല തിരുമേനിയെ വാഴിച്ചതും നിരണം ഭദ്രാസന മെത്രാപ്പോലീത്തയായി നിയമിച്ചതും അന്ത്യോഖ്യാപാത്രിയര്‍ക്കീസാണ്. പാത്രിയര്‍ക്കീസിന് ഉടമ്പടിപത്രം (ശല്‍വൂസ) നല്‍കിയതില്‍ പരുമല തിരുമേനിയുടെ അന്ത്യോഖ്യാ സിംഹാസന വിധേയത്വം വ്യക്തമാണ്.
പരുമല സെമിനാരിയും സ്വത്തുക്കളും 1934 ലെ ഭരണഘടനക്ക് വിധേയമല്ല എന്നും മലങ്കരസഭയുടെ പൊതുസ്വത്തില്‍ ഉള്‍പ്പെടില്ല എന്നും കോടതികള്‍ തീര്‍പ്പ് നല്‍കിയിട്ടുള്ളതാണ്. സത്യമിതായിരിക്കെ യാക്കോബായസഭ ഒരു അവകാശത്തിനും ശ്രമിച്ചിട്ടില്ല, ആഗ്രഹിക്കുന്നുമില്ല- മെത്രാപ്പോലീത്ത പറഞ്ഞു.
പരുമലയില്‍ ഒരേപേരില്‍ പള്ളി നിര്‍മ്മിക്കില്ലെന്നും ഒരേദിവസ്വം പെരുനാള്‍ നടത്തില്ലെന്നും വ്യക്തമാക്കിയിട്ടുള്ളതാണ്. നിയമങ്ങള്‍ പാലിച്ചാണ് വെബ്‌സൈറ്റ് നിര്‍മ്മിച്ചിട്ടുള്ളത്. എന്നാല്‍ ഇക്കാര്യത്തില്‍ വിട്ടുവീഴ്ചയ്ക്ക് സഭ തയ്യാറാണ്. ഓര്‍ത്തഡോക്‌സ് സഭയുടെ നിലവിലുള്ള പരുമല പള്ളിയിലെ സ്ഥാപനങ്ങളോ സ്വത്തുക്കളോ യാക്കോബായ സഭ ആഗ്രഹിക്കുന്നില്ല. എന്നാല്‍ പരുമല പ്രദേശത്ത് ആരൊക്കെ ദേവാലയം സ്ഥാപിക്കണമെന്ന് തിരുമാനിക്കുന്നതിനുള്ള അധികാരം ഓര്‍ത്തഡോക്‌സ് സഭയ്ക്കല്ലെന്നും മാര്‍ കൂറിലോസ് മെത്രാപ്പോലീത്ത പറഞ്ഞു.
No comments:
Post a Comment