| Wednesday | October 06 |
കൊച്ചി: പരുമല സെമിനാരിയുടെ ഉടമസ്‌ഥാവകാശ രേഖ പരിശുദ്ധ പാത്രിയര്ക്കീസ് ബാവയുടെ പേരിലാണെന്നു യാക്കോബായ സഭ. അരികുപുറത്തു കുടുംബക്കാര്‍ പാത്രിയര്ക്കീസ് ബാവായ്‌ക്ക് ഇഷ്‌ടദാനം നല്‍കിയതാണു സെമിനാരി സ്‌ഥലം. യാക്കോബായ സഭയുടെ പരിശുദ്ധനായ ആലുവായിലെ വലിയ തിരുമേനിയാണു പരുമല സെമിനാരി പണിയാന്‍ നേതൃത്വം നല്‍കിയതെന്നു നിരണം ഭദ്രാസനാധിപന്‍ ഡോ. ഗീവര്‍ഗീസ്‌ മോര്‍ കൂറിലോസ്‌ പറഞ്ഞു.
എന്നാല്‍, തെറ്റായ അവകാശവാദം വിലപ്പോവില്ലെന്നും പള്ളിപണിയെ എന്തു വിലകൊടുത്തും നേരിടുമെന്നും മലങ്കര ഓര്‍ത്തഡോക്‌സ് സഭാ സെക്രട്ടറി ഡോ. ജോര്‍ജ്‌ ജോസഫ്‌ വ്യക്‌തമാക്കി.
ആലുവ തൃക്കുന്നത്തു സെമിനാരിയില്‍ തങ്ങള്‍ക്ക്‌ ആരാധനാസൗകര്യം ലഭിച്ചില്ലെങ്കില്‍ പരുമലയിലും മൂവാറ്റുപുഴ, തൃശൂര്‍ മണ്ണുത്തി അരമനകളിലും അവകാശവാദം ഉന്നയിച്ചു രംഗത്തുവരാനാണു യാക്കോബായ വിഭാഗത്തിന്റെ നീക്കം.
വടക്കന്‍പ്രദേശത്തു യാക്കോബായ പള്ളികളില്‍ പ്രശ്നം സൃഷ്‌ടിക്കുന്നതു തുടര്‍ന്നാല്‍ എതിര്‍വിഭാഗത്തിന്റെ പൗരാണിക ദേവാലയങ്ങളില്‍ അവകാശമുന്നയിക്കും. ഡോ. തോമസ്‌ മാര്‍ അത്താനാസിയോസ്‌ ഓര്‍ത്തഡോക്‌സ് സഭയില്‍ ചേരുകവഴി മൂവാറ്റുപുഴ അരമന നഷ്‌ടപ്പെട്ട യാക്കോബായ സഭ അതിനടുത്തുതന്നെ സ്‌ഥലംവാങ്ങിക്കഴിഞ്ഞു.
തെക്കന്‍പ്രദേശങ്ങളില്‍ കൂടുതല്‍ പള്ളികള്‍ സ്‌ഥാപിച്ചു നിരണം, കൊല്ലം, തുമ്പമണ്‍ ഭദ്രാസനങ്ങളില്‍ സഭയുടെ ശക്‌തി വര്‍ധിപ്പിക്കാനും അവര്‍ ആലോചിക്കുന്നു.
അന്തോഖ്യാ പാത്രിയര്‍ക്കീസായിരുന്ന പരിശുദ്ധ പത്രോസ് തൃതീയന്‍ ബാവയാണു പരുമല തിരുമേനിയെ വാഴിച്ചതും നിരണം ഭദ്രാസന മെത്രാപ്പോലീത്തയായി നിയമിച്ചതും. എന്നിട്ടും ഓര്‍ത്തഡോക്‌സ് പക്ഷത്തിന്റെ കൈവശമുള്ള സെമിനാരിയിലോ പള്ളിയിലോ യാക്കോബായ സഭ ഇതുവരെ അവകാശവാദം ഉന്നയിച്ചിട്ടില്ല.
എന്നാല്‍ യാക്കോബായ വിശ്വാസികള്‍ക്കായി പരുമലയില്‍ പള്ളി പണിയാനുള്ള ശ്രമത്തെ എതിര്‍ക്കുന്നതു നീതിയല്ലെന്നു മോര്‍ കൂറിലോസ്‌ പറയുന്നു. പള്ളിപണി തടഞ്ഞ തീരുമാനം പുനഃപരിശോധിക്കണമെന്നാവശ്യപ്പെട്ടു കലക്‌ടറെ സമീപിക്കും. മഞ്ഞനിക്കര തീര്‍ഥയാത്രയ്‌ക്കു പോകുന്നവരില്‍ ഏറെയും പരുമല, പുതുപ്പള്ളി, നിരണം പള്ളികള്‍ സന്ദര്‍ശിച്ചാണു മടങ്ങുന്നത്. പുതുപ്പള്ളിയില്‍ പഴയ പള്ളിക്കു സമീപം യാക്കോബായ വിഭാഗം പള്ളിപണിതിട്ടുണ്ട്‌.
പിറവം, കോതമംഗലം, മുളന്തുരുത്തി എന്നിവിടങ്ങളില്‍ യാക്കോബായ പള്ളികളോടു ചേര്ന്ന് ഓര്‍ത്തഡോക്‌സ് പള്ളി നിര്‍മിച്ചതിനെ അവര്‍ എതിര്‍ത്തില്ല. ഓര്‍ത്തഡോക്‌സുകാര്‍ ഇല്ലാത്ത പുത്തന്‍കുരിശിനടുത്തു മീമ്പാറയില്‍ കണ്ടനാട് ഭദ്രാസനത്തിന്റെ ആസ്ഥാനം പണിയുന്നതിനെയും തങ്ങള്‍ എതിര്‍ത്തില്ല. വടക്കന്‍പറവൂര്‍ പള്ളിയോടു ചേര്ന്ന് ഓര്‍ത്തഡോക്‌സ് വിഭാഗം പള്ളി പണിയാന്‍ തുടങ്ങിയിട്ടുണ്ടെന്നും അദ്ദേഹം പറയുന്നു.
യാക്കോബായ സഭയുടെ നീക്കം മനഃപൂര്‍വം പ്രശ്നം സൃഷ്‌ടിക്കാനാണെന്ന്‌ ഓര്‍ത്തഡോക്‌സ് സഭാ നേതൃത്വം പറയുന്നത്‌. അനുയായികള്‍ ഇല്ലാത്തിടത്തു പള്ളിവയ്‌ക്കുന്നതിനു ന്യായീകരണമില്ലെന്നും സഭാ സെക്രട്ടറി ഡോ. ജോര്‍ജ്‌ ജോസഫ്‌ പറയുന്നു. 'പരുമലപ്പള്ളി ഒന്നേയുള്ളൂ; അതേപേരില്‍ പള്ളിപണിയുന്നതും വെബ്‌സൈറ്റ്‌ ആരംഭിച്ചതും ദുരുദ്ദേശത്തോടെയാണ്‌'- അദ്ദേഹം ചൂണ്ടിക്കാട്ടി.
No comments:
Post a Comment